Прэм'еру іранічнага дэтэктыва рыхтуюць у Гомельскім драмтэатры

Гомельскі абласны драматычны тэатр рыхтуе прэм'еру іранічнага дэтэктыва ў дзвюх дзеях "Справа пра серыйнае каханне" паводле п'есы "Дзень нараджэння Сіняй Барады" Андрэя Максімава, паведамілі БЕЛТА ў дзяржаўнай установе.

Гісторыя прысвечана жанчынам. "Створана для жанчын, напісана аб жанчынах. Тым больш дзіўна, што прыдумана яна мужчынам. Напісана з вялікай любоўю, разуменнем і нават пяшчотай", - звярнулі ўвагу ў тэатры.

У замку барона, якога празвалі Сіняя Барада, адбываюцца дзіўныя рэчы. Па чутках, там знікаюць жанчыны. А яшчэ ў замку ёсць патаемны пакой, у які гаспадар нікога не дапускае. "Чым жа займаецца там Сіняя Барада? Хто ён - каварны ліхадзей, фанатык-вучоны, а можа, проста рамантык і дзівак? Словам, сюжэт - падстава і для фарсу, і для драмы, і, вядома, для дэтэктыўнага расследавання. Тым больш, што весці яго будзе агент Пол, у якога (якой?) яшчэ ніколі не здаралася асечак", - заінтрыгавалі стваральнікі спектакля.

Над усёй гэтай гісторыяй лунае каханне. "Як адзіны сэнс. Як адзіная каштоўнасць. І як адзінае ратаванне. Хіба гэта не тое, аб чым варта гаварыць цяпер у нашым заблукаўшым у хімерах свеце?" - дадалі ў тэатры.

Прэм'ерныя паказы запланаваны на 28, 29 чэрвеня. да спісу навін